Reported By :H.D.Savita
ಟೋಕಿಯೋ: ಟೋಕಿಯೊ ಪ್ಯಾರಾಲಿಂಪಿಕ್ ಕ್ರೀಡಾಕೂಟದಲ್ಲಿ ಭಾನುವಾರ ಭಾರತದ‌ಪಾಲಿಗೆ ಸೂಪರ್ ಸಂಡೇ‌ಅಂತಾನೇ ಹೇಳಬಹುದು. ಒಂದಲ್ಲ, ಎರಡಲ್ಲ ಬರೋಬ್ಬರಿ 3 ಪದಕಗಳು ದೊರೆತಿದ್ದು, ಭಾರತಕ್ಕೆ ಅತ್ಯಂತ ವಿಶೇಷವಾದ ದಿನವಾಗಿತ್ತು.
ಭಾರತ ಒಂದಲ್ಲ, ಎರಡಲ್ಲ, ಮೂರು ಪದಕಗಳನ್ನು ಗೆದ್ದಿದೆ. ಭವೀನ ಪಟೇಲ್, ನಿಶಾದ್ ಕುಮಾರ್ ಮತ್ತು ವಿನೋದ್ ಕುಮಾರ್ ಭಾನುವಾರ ಹ್ಯಾಟ್ರಿಕ್ ಪದಕಗಳನ್ನು ಗೆದ್ದು ದೇಶಕ್ಕೆ ಭಾನುವಾರ ಸೂಪರ್ ಸಂಡೆ ಮಾಡಿದರು.
ಟೇಬಲ್ ಟೆನಿಸ್ ನಲ್ಲಿ ಭವಿನಾ ಪಟೇಲ್ ಅವರ ಬೆಳ್ಳಿ ಪದಕದೊಂದಿಗೆ ಭಾನುವಾರ ದಿನ ಆರಂಭವಾಯಿತು. ಚಿನ್ನ ಗೆಲ್ಲುವಲ್ಲಿ ಎಡವಿದರೂ, ಬೆಳ್ಳಿ ಗೆಲ್ಲುವ ಮೂಲಕ ಇತಿಹಾಸ ಸೃಷ್ಟಿಸಿದರು. ಪ್ಯಾರಾಲಿಂಪಿಕ್ ಕ್ರೀಡಾಕೂಟದಲ್ಲಿ ದೇಶಕ್ಕಾಗಿ ಪದಕ ಗೆದ್ದ ಎರಡನೇ ಮಹಿಳೆ ಹಾಗೂ ಟೇಬಲ್ ಟೆನಿಸ್‌ನಲ್ಲಿ ಪದಕ ಗೆದ್ದ ಮೊದಲ ಮಹಿಳೆ ಎನಿಸಿಕೊಂಡರು.
ಇದಾದ ಬಳಿಕ ನಿಶಾದ್ ಕುಮಾರ್ ದೇಶಕ್ಕೆ ಎರಡನೇ ಪದಕ ಪಡೆದರು. ಟಿ 47 ಹೈಜಂಪ್ ಸ್ಪರ್ಧೆಯಲ್ಲಿ ಭಾಗವಹಿಸಿದ ನಿಶಾದ್, 2.06 ಮೀಟರ್ ಸ್ಪರ್ಧೆಯಲ್ಲಿ ಬೆಳ್ಳಿ ಪದಕ ಗೆದ್ದರು.
ಇನ್ನು ಮೊದಲ ಒಲಿಂಪಿಕ್ಸ್ ಆಡುತ್ತಿರುವ ವಿನೋದ್ ಕುಮಾರ್, ದೇಶಕ್ಕಾಗಿ ಮೂರನೇ ಪದಕ ಗೆದ್ದರು. ಅವರು 19.91 ಮೀಟರ್ ಡಿಸ್ಕಸ್ ಥ್ರೋನಲ್ಲಿ ಏಷ್ಯನ್ ದಾಖಲೆ ನಿರ್ಮಿಸಿದರು ಮತ್ತು ಕಂಚಿನ ಪದಕವನ್ನು ಗೆದ್ದರು.
ಒಟ್ನಲ್ಲಿ ರಾಷ್ಟ್ರೀಯ ಕ್ರೀಡಾ ದಿನದಂದು ಮೂರು ಪದಕಗಳು ಬಂದಿರೋದು ಮತ್ತಷ್ಟು ವಿಶೇಷವೆನಿಸಿದೆ.
